Ons sien by Laerskool Raslouw na ‘n besige en lekker jaar uit. Die inskrywings wys dat ouers toenemend besef hoe belangrik die gehalte van onderwys is.

Van die kleuters (beginnende by 3 jaar oud) tot die Graad 7′s gaan hierdie jaar weer baat by die stabiliteit van ons onderwysaanbieding wat die fokus op sterk basiese vaardighede hou, leerlinge in die natuurwetenskappe inlei, die Geskiedenis en Bybelkunde nie afskeep nie, en skoolgaan se waarde afrond met sport, musiek en ander buitemuurse bedrywighede.

Die junior primêr (graad 1 – 3) en senior primêr (graad 4 – 6) aanbieding gaan voort op die basis wat in die afgelope jare gestabiliseer is.

Terloops, dat leerlinge al van kleutertyd af aan Engels blootgestel word, en van Graad 1 af aktief vaardighede daarin leer, is vir ons niks nuuts nie. Laerskool Raslouw het dit van meet af aan al ingewerk in sy kurrikulum en ons skooltye hoef nie aangepas te word soos vir die staatskole onlangs aangekondig is nie. Ons bied al lank reeds jaarliks naas ‘n redenaarskompetisie in Afrikaans, ‘n “Speech Festival” aan waaraan leerlinge van jongs af deelneem.

Die Graad 7′s maak in 2012 die eerste versigtige skuif na hoërskool toe. Hulle gaan voort met die kernvakke (Afrikaans, Engels en Wiskunde) en gaan ingelei word in ‘n wye reeks vakke en konsepte, en onder andere handel en tegnologie, wat ‘n vars benadering van bekendstelling aan toekomstige rekeningkunde asook die inligtingstegnologie en rekenaarwêreld asook ontwerp (tegniese tekeninge en meer) behels. Hulle gaan meer bewus word van die wonders van fisika, chemie en biologie, met ‘n skoot aardrykskunde, geskiedenis daarby, terwyl die Bybelkunde voortgesit word. Die klasmusiek en LO (liggaamsoefening) rond die aanbieding af en dit alles maak skoolgaan lekker en volledig. Hulle aanbieding neem in ag dat hulle vanaf graad 8 met die IGCSE (Cambridge) vakke moet begin en hulle word daarvoor voorberei.

Ons is bly dat mev Salomé Visagie (Afrikaans en Biblioteek) en dr Abie van Wyk (fisika en chemie) as deeltydse onderwysers aanbly vir die Graad 7-aanbieding. Juffrou Salomé gaan ook vir die res van die laerskool die biblioteekperiodes aanbied en ons vinnig groeiende biblioteek aktief uitbou.

Op die personeelfront verwelkom ons ‘n bykomende permanente personeellid, mnr Pierre-Uys Hoffman (B.Ed (Hons)). Ons hoop hy en sy gesin gaan gou tuisvoel tussen die Woeries. Hy wil graag sy entoesiasme vir die klaskamer en vir sport aan die leerlinge oordra.

Die liggaamlike opvoedingskant word vanaf 2012 verder gevat met ‘n eksterne kinderkinetikus wat die LO (liggaamsoefeninge) weekliks by die skool kom aanbied. Die LO is reeds deur ons huidige personeel gevestig, maar dit het waarde om die gespesialiseerde kennis van die kinderkinetikus te benut vir stadskinders wat toenemend gehelp moet word om fiks en sterk te word in ‘n omgewing waar kinders nie meer vrylik in die strate en die oop stukkies veld kan rondhardloop en speel nie.

Met nege voltydse onderwysers, ‘n voltydse musiekonderwyseres, twee deeltydse onderwysers, ‘n voltydse skoolsekretaresse asook die kinderkinetikus en die ondersteuningspersoneel van Indicato is die skool gerat vir nog ‘n jaar van lees, skryf en reken, sport, musiek, redenaars en sommer baie pret!

(Doen navraag by navrae@raslouwskool.co.za of vra vir ‘n kopie van “Krummels” (die laaste uitgawe van 2011 is propvol inligting en voorbeelde van die werk van leerlinge van Laerskool Raslouw)

>>> BAIE DANKIE aan almal wat die opedag ‘n sukses help maak het: onderwysers, ouers, stalletjie-bemannings en die sportorganiseerder – en veral die besoekers! Ons verwerk die aansoeke so gou ons kan! <<<
__________________

Ons volgende opedag word gehou op DV Saterdag, 17 September 2011.

Kom kuier by die Woeries; kom kyk hoe gesonde vakonderwys by Laerskool Raslouw aangebied word.

Kom loer in by die voorskoolse kleuter- en graad 0-klasse; besoek elke klas vir elke graad van graad 1 tot 7; ontmoet die onderwysers; blaai ons handboeke deur; kyk deur voorbeelde van die leerlinge se werk. Gesels met die musiekjuffrou. Laat skoolouers u vertel hoekom die skool se koor telkens by kultuuraande vir encores teruggeroep word; hoekom Afrikaanse en Engelse redenaarsaande so belangrik in ons skool is. Die skool waar ons hard werk in die klaskamer, lekker speel as dit pouse is, ons harte uitsing as ons die skoollied sing, en waar ons onderwys relevant is die leerling inlei in die wêreld waarin hy leef en gaan werk. In vandag se wêreld.

Byvoorbeeld uit ‘n onlangse omsendbrief:
“Uitstappie na Die Munt: Ons graad 4 – 6 leerlinge het ‘n heerlike uitstappie op 27 Julie, na Die Munt meegemaak. Juffrou Adri en Juffrou Charmain het net so baie soos die kinders geleer. Die geskiedenis van Die Munt is net so interessant. Daar is ‘n gids wat die publiek ook naweke kan wysmaak. Ouers kan gerus so ‘n gesinsuitstappie oorweeg. Daarna het ons heerlik by die restaurant geëet en gekuier. Dankie aan die kinders wat hulle so mooi gedra het.”

Kom vra u vrae en gesels met die direkteure.

Woon die landloop by en kom koop iets oulik of lekker by die Woerie-winkel-mark.

Op die hoek van Theuns van Niekerk- en Estcourtlaan in Wierdapark. Skakel 082-5732-732 of die skoolterrein se nommer 012-653-6127 vir meer inligting. Stuur u navrae solank aan navrae@raslouwskool.co.za